روز اليوسف صحيت يا رجالة (مسمار جحا وشرف الصحافة)2

سبحانك يا رب

روز اليوسف صحيت بعد طول سبات

المبيعات بقى يا رجالة بتحكم

الجماعة عاوزين يبيعوا

ايشمعنى الدستور والمصري اليوم كتبوا كلام لا أساس له من الصحة حول شباب الإخوان والمدونون

ومبيعاتهم بقت فل الفل

الفرق بقى إن الدستور المحررين بتوعه كتبوا الكلام اللي كتبوه وكلنا عارفين هو ليه خرج بالشكل ده

ومين عاوز ايه وليه

أما عندما تكتب العجوز المترهلة روز اليوسف كلاما مثل هذا

فهي تغازل الحزب الحاكم (اللي بيصرف عليها على الرغم من فشل مبيعاتها) وفي نفس الوقت هي بتمارس عادتها في إهانة صحفييها ومحرريها بتوريطهم في هذه التغطيات الهزلية

أنا طبعا ماباشتريش المجلة السفيهة دي اطلاقا

لكن أحد المقربين لي

قال لي أن المجلة خرفت

وفوجئت بكلام يفترى على لسان اخواني المدونين

وآخر يفترى على لسان الدكتور مرسي

وثالث ينسب للأستاذ المرشد

الله ده الفشر على عينك يا تاجر

شوفوا كده

وشوفوا دي كمان

وبعدين الدكتور محمد مرسي أكد أنه لم يصرح بشيء في هذا الصدد
وأكد أنهم (كدابين زي العادة) ده على لسانه

وكمان هو مش مشرف قسم الطلاب ولاحاجة

كما أنني سألت فضيلة المرشد وأكد أن موقفه واضح جدا

أنه لم ولن يصرح أبدا لهذه المجلة بأي تصريح تحت أي مسمى ولو لم يتبق منفذ إعلامي غيرها في مصر

وبعدي لو افترضنا (وأنا متأكد أن ده مش صحيح) أن أحمد عبدالفتاح فعلا هاجم الإخوان بهذا الشكل

وبعدين رجع يشكر فيهم

ايشمعنى المحرر الهمام (اللي واضح إن آخر تعليمه الإعلامي كان في المدرسة الإبتدائية) ذكر هجوم أحمد بدون أن يعلق عليه وبعدين لما أحمد شكر في الجماعة اعتبر ده إزدواجية وبرر ده أنه متربي في جماعة مسؤليها كدابين ووحشين

وتجلت صنعة الكذب عندما ذكروا على لسان المدونة أروى الطويل ما لم يذكر في مدونتها أبدا بلهجة لم نسمعها منها من قبل حيث يبدوا الكلام للقارئ وكأنها تتهكم على الجماعة مع أن الواقع على العكس تماما فهي من خير المدونين الذين يعبرون عن الجماعة برؤيتهم وقلمهم الحر

وبعدين ذكرت المجلة الموقرة والمحرر الشجيع أن أنا وأخويا أحمد صاحب مدونة الشاب الحر الأبي عندنا مدونة واحدة وان هي ماشية في السياق ومنضبطة

طب ردوا انتوا عليهم والنبي لحسن أنا ضغطي ممكن يعلى

قال يعني المحرر متابع ومحقق في الموضوع

وبسؤال كلا من الدكتور محمد مرسي والأستاذ المرشد أكدوا أنهم على يقين من كذب تلك المجلة الصفراء وأنهم أبدا لن يكذبوا أبنائهم ويصدقوا مثل هؤلاء المرتزقة صاحبي الأقلام الفارغة من الحبر الشريف

ثم المانشيت اللي جابه المحرر الفظيع على لسان الأستاذ المرشد بأن الشباب تحت جزمته لم يرد في سياق التغطية الإعلامية الرفيعة للمحرر الهمام ورئيس التحرير المخضرم

يعني مانشيت متألف

وتصريحات الدكتور محمد مرسي _ أو بابا كما أناديه أحيانا_ نفاها هو نفيا قاطعا

لا يا شيخ تصدق كده أن أنت نجحت وخليت الشباب متغاظ من قيادته والقيادة زعلانة من شبابها

ده طبعا على أساس أنك اعتبرت أننا ماعندناش عقول تفكر وتفهم مؤامرات المخبرين من أمثالك ورئيس تحريركم الموقر

وبصراحة زمان القيادة مجتمعة دلوقتي وسايبة اللي قدامها واللي وراها ومصدقة اللي أنت قلته عن الشباب وعمالة تدبر إزاي تخلص من أبناءها المخلصين لدعوتهم غصب عنك

وزمان المدونين هما كمان عمالين يوزعوا أدوار مكتب الإرشاد الموازي الذي ستتبوأ مقعد المرشدية فيه أخت من الأخوات

كخطوة في طريق إعادة حقوق الأخوات المهدرة في الجماعة

هيهات يا هذا

شباب الإخوان أفهم وأعقل من هذا

وقيادتهم تثق فيهم جدا

وتخطو بتؤدة لأنها تأخذ بأيديهم ويأخذون بيدها

ولو ضرب آلاف من أمثالك رؤوسهم في الصخر لن يتغير حالنا أبدا بإذن الله إلا إلى الأفضل

طب قولولي انتوا بقى :

معلوملت خاطئة زي اللي قالوها عني وعن أخي

ومانشيت كاذب

وتصريحات زائفة

واتهام لأحمد عبدالفتاح بالإزدواجية رغم إن كلامه متوازن جدا
وكذب على قلم ولسان أروى الطويل

ده كله معناه ايه؟

من وجهة نظري

إن ده يا إما أداء مخبرين

يبقى مش هايعجب الجماعة بتوع الأمن لأنه يثير الضحك

ولا يقنع غرا ساذجا

يا إما محاولة لرفع المبيعات

وبرضه من رأيي أن الاحتمالين رخيصين جدا

ولا يليقوا بالصحافة المحترمة والشرف الصحفي

بس اتفقوا معي أنهم لايقين على روز اليوسف..... ولا إيه؟